सानेपा हत्याकाण्ड : अनुसन्धान सकियो, मोबाइलले पनि खुलाएन कारण

नेपाल लाइभ | २०७६ फागुन १३ मंगलबार | Tuesday, February 25, 2020 १३:२९:०० मा प्रकाशित

काठमाडौं–पूर्वसचिव अर्जुन कार्कीकी श्रीमती मुना कार्की र उनीहरुको घरमा काम गर्ने युवक विजय चौधरीको ज्यान जाने घटनाको अनुसन्धान सकिएको प्रहरीले जनाएको छ। 

महानगरीय प्रहरी परिसर ललितपुरका एसएसपी टेकप्रसाद राईले अनुसन्धान सकिएकाले केही दिनमै सरकारी वकिल कार्यालयमा प्रतिवेदन बुझाउने जानकारी दिए। 

प्रहरी अनुसन्धानले भने नयाँ तथ्य केही उजागर गरेको छैन। अनुसन्धानले कार्कीको हत्या तथा चौधरीको आत्महत्या भएको पुष्टि गरेको छ। 

कार्की र चौधरीको शवको पोस्टमार्टमका आधारमा हत्या र आत्महत्या पुष्टि भएको हो। 

महानगरीय प्रहरी परिसर ललितपुरका एसएसपी राईका अनुसार कामदार चौधरीको ह्याङ्गिङका कारण र कार्कीको घाँटी दबाइएका कारण मृत्यु भएको उल्लेख छ। रिपोर्टमा हत्या र आत्महत्या भन्ने खुले पनि कारण खुल्न सकेको छैन। 

घटनाको प्रकृतिका आधारमा कार्कीको हत्या गरेर चौधरीले आत्महत्या गरेको निष्कर्ष प्रहरीको छ। प्रहरीले घटनास्थलबाट विभिन्न प्रमाण संकलन गरेको थियो। तर निष्कर्षलाई सघाउने थप प्रमाण फेला परेको छैन।

घटनास्थलको अवस्था र पोस्टमार्टम रिपोर्टका आधारमा चौधरीले कार्कीको घाँटीमा नाइलनको डोरी बेरेर कसेर त्यसपछि पिर्काले हानेर हत्या गरेको निष्कर्ष प्रहरीको छ। त्यसपछि उनले आत्महत्या गरेका थिए।

घटनास्थलको अवस्थाले नै विनाकारण कार्कीको हत्या भएको देखाउँदैन। घटनास्थलका दृश्यले यो योजनाबद्ध भन्दा आवेशप्ररित देखाउने प्रहरीको भनाइ छ। घटना अगाडि के भएको थियो र चौधरी हत्या र आत्महत्याको मोडमा पुगे भन्ने खुल्न सकेको छैन।

मोबाइलले खुलाएन कारण 

पोस्टमार्टम रिपोर्टसँगै प्रहरीले दुवै जनाको मोबाइल डिजिटल फरेन्सिक ल्याबमा पठाएको थियो। फरेन्सिक जाँचमा मोबाइलमार्फत् आदानप्रदान भएका म्यासेज, कल डिटेल, अडियो, भिडियो, फोटालगायतका सामग्री रिकभर हुने गर्छ। 

फरेन्सिक ल्याबबाट समेत रिपोर्ट आइसकेको छ। तर त्यसले पनि हत्याको कुनै कारण नखुलाएको एसएसपी राईले जानकारी दिए।

मोबाइलमा उनीहरुका पारिवारिक फोटाबाहेक कार्की र चौधरीको सम्बन्ध खुलाउने खालका कुनै फोटा नदेखिएको प्रहरीले जनाएको छ। फोन डिटेलबाट पनि उनीहरुको हत्याको कारण खुल्न सकेन।

यसरी भएको थियो हत्या र आत्महत्या

माघ २७ गते बिहान १० देखि ११ बजेको बीचमा हत्या र आत्महत्या भएको थियो। 

घरमा भएका १२ वर्षीय छोरालाई स्कूल पुर्‍याउन अर्की कामदार गएको र पूर्वसचिव अर्जुन कार्की पशुपतिनाथको मन्दिर दर्शन गर्न गएको मौकामा हत्या र आत्महत्या भएको थियो।

अर्जुन घरबाट निस्कँदा उनकी पत्नी मुना, १२ वर्षीय एक छोरा, कामदार विजय चौधरी र अर्की एक कामदार महिला पनि घरमा नै थिए।

उनी प्रदेश ३–०१ ०२२ च ०७०९ नम्बरको कार लिएर ८ बजे पशुपति पुगेका थिए। करिब २ घन्टा लाइन बसेर उनले पूजा गरेका थिए। त्यसपछि उनी करिब ११ बजेतिर घर फर्किए। घरको गेट बन्द थियो। घन्टी बजाउँदा कोही पनि आएनन्। तर बाहिरबाट समेत खोल्न मिल्ने गेट खोलेर उनी घरभित्र पसे।

दुईतले घरको भुईंतलाको भ¥याङ छेउमा कामदार चौधरी घाँटीमा नाइलनको डोरी लगाएको अवस्थामा मृत भेटिएका थिए। भान्सा कोठामा श्रीमती मुना रक्ताम्य भएर लडिरहेको अवस्थामा थिइन्। ४९ वर्षीया मुनालाई उपचारका लागि सानेपास्थित स्टार अस्पताल लगिएको थियो। उपचारकै क्रममा मृत्यु भएको थियो।